Campus News and Updates : Buwan ng Wika Ipinagdiwang, Munting Mutya at Lakan ng APMI 2009 Hinirang

Buwan ng Wika Ipinagdiwang, Munting Mutya at Lakan ng APMI 2009 Hinirang

Ipinagdiwang ng mga APMIans mula Preschool, una, ikalawa, ikatlo at ikaapat na baitang sa elementarya ang Buwan ng Wika noong ika-26 ng Agosto sa pamamagitan ng isang pagtatanghal sa Activity Center ng LCC Mall- Naga. Wikang Filipino: Mula Baler, Hanggang Buong Pilipinas ang tema ng pambansang pagdiriwang sa taong ito.Tampok din sa nasabing okasyon ang pagpili ng bagong Munting Mutya at Lakan ng APMI mula sa mga mag-aaral sa Preschool. Naging makulay ang pagtatanghal ng bawat baitang na nagpakitang gilas sa kani-kanilang mga piling bilang. Sabayang binigkas ng mga nasa unang baitang ang tulang, Sa Aking mga Kababata na isinulat ni Dr. Jose Rizal. Inawit ng mga nasa ika-apat na baitang ang Sarong Banggui at sumayaw naman ang mga nasa ikatlong baitang. Tinanghal na Best Presentation o Natataning Bilang ang etnikong sayaw ng mga nasa ikalawang baitang. Tuwang-tuwa sila nang tanggapin nila ang kanilang tropeo sa pagiging kampeon.
Samantala, hindi rin nagpahuli ang mga mag-aaral sa Preschool na nagpamalas ng kanilang husay sa pagsasayaw, pagmodeling at pagpapakilala. Makukulay at magagara ang mga kasuotang etniko,Filipiniana at Barong Tagalog ng mga mag-aaral na sa kabila ng pagiging mga musmos ay nagpamalas ng kanilang angking galing sa harap ng maraming manonood. Mula sa mga kandidata ay pumili ng mga natatanging mag-aaral na siyang tinanghal na Munting Mutya at Lakan ng APMI 2009.